Хитой АҚШ томонидан Шимолий Кореяга қарши бир томонлама санкциялар жорий этилишини ёқламади

Хитой АҚШ томонидан БМТ Хавфсизлик кенгашининг янги резолюциясида кўзда тутилганидан ташқари қўшимча санкциялар жорий этилишини ёқламади. Бу ҳақда Хитой ТИВ расмий вакили Лу Кан маълум қилди, дея хабар беради «ТАСС». 

«Биринчидан, Хитой ҳар қандай бир томонлама санкцияларни ёқламайди. Иккинчидан, Корея ярим оролидаги вазият мураккаблигича қолмоқда ва биз қарама-қаршиликни чуқурлаштириши мумкин бўлган ҳаракатларга қаршимиз. Учинчидан, исталган давлатнинг ҳар қандай бир томонлама ҳаракатлари Хитой манфаатларига зид келмаслиги лозим», — дея таъкидлаган Кан. 

Барак Обама олдинроқ КХДР ҳукумати ва Корея Меҳнат партиясининг АҚШ ҳудудидаги мол-мулки ва капитал қўйилмалари музлатилиши, Пхеньян билан бир қатор тижорий келишувларга чеклов ўрнатилиши кўзда тутилган қарорни имзолаганди.