Россия махсус хизматлари 2014 йилда Сочида бўлиб ўтган Олимпиада ўйинлари вақтида хавфсизликни таъминлаш учун экстремистларнинг жанубий ҳудудлардан чет элга чиқиб кетишига имкон яратган. Бу ҳақда «Халқаро инқироз гуруҳи» (XИГ) экспертлари томонидан тайёрланган маърузада айтилади, деб ёзади Meduza.
XИГ маълумотларига кўра, сўнгги икки йил ичида Шимолий Кавказдаги деярли барча республикаларда террористик фаоллик даражаси пасайган. Бундай натижага нафақат ҳарбийларнинг самарали ҳаракатлари, балки жангариларнинг ялпи тарзда Сурияга жўнаб кетганлиги ҳам сабаб бўлган бўлиши мумкин, деб ҳисоблайди экспертлар.
XИГдагилар таъкидлашича, Сочи Олимпиадаси арафасида ҳарбийлар мамлакатнинг жанубий ҳудудларидан жангарилар чиқиб кетишини енгиллаштирадиган шароитларни яратган. Экспертлар «Коммерсантъ» нашрига берган маълумотида Олимпиада олдидан «махсус хизматлар билан боғлиқ кишилар» экстремистларга чет эл паспортини расмийлаштириш ва Туркияга чиқиб кетишга ёрдам берганини тасдиқлади.
Олимпиададан сўнг Шимолий Кавказнинг экстремистик кайфиятдаги аҳолиси устидан назорат кучайди. Россия Федерациясидан ташқарида ноқонуний гуруҳлар фаолиятида қатнашганлик учун жиноий жавобгарликка тортиш ҳақидаги қонунни қабул қилиш орқали, Россиядан ташқарига чиқиб кетган жангариларга қайтиб келишни тақиқлашди.
Изоҳ (0)