Қодиров Чеченистон раҳбари бўлишни истамаслигини маълум қилди

Рамзан Қодиров «РСН» радиостанциясига берган интервьюсида Чеченистон раҳбари бўлишни истамаслигини тан олди. Бу ҳақда «РБК» нашри хабар қилмоқда.

«Қодиров давом эттиришни истайдими? Истамайман. Ҳозир иқтисодий ва ижтимоий нуқтаи назарлардан бошқача даврдир. Жамоамизда янада профессионалроқ одамлар бор. Мен ўз бурчимни адо этдим деб ўйлайман. Бизни етаклаётган, текшираётган, кўраётган, мувозанатга келтираётган одамлар – улар келажакдаги ривожланиш учун нима кераклигини яхшироқ билади. Жамоа бор, мамлакат президенти бор. Барчаси Аллоҳнинг иродаси билан. Агар хизматда давом эт дейишса, давом этаман, хайр дейишса – видолашаман», – тушунтирди Қодиров.

Шунингдек, сиёсатчи ҳозирча сайловолди кампанияси ҳақида ўйламаётганини, отаси, марҳум Аҳмад Қодировнинг жамоасига раҳбарлик қилганидан бахтиёр эканлигини таъкидлади.

Рамзан Қодировнинг Чеченистон раҳбари сифатидаги ваколат муддати 2016 йилнинг 5 апрель куни ниҳоясига етади. Февраль ойида Қодиров янги муддатга сайланишга ҳаракат қилиш ҳақида ўйламаётганини қайд этиб ўтганди.