Буюк Британия бош вазири Дэвид Кэмерон агар британияликлар Европа Иттифоқидан чиқишга овоз берса, мамлакат иттифоқни тарк этиши ва иккинчи референдум ўтказиш имконияти бўлмаслиги ҳақида огоҳлантирди, деб хабар қилади «ТАСС».
Кэмерон бу ҳақда Британия парламентининг қуйи палатасидаги чиқишида маълум қилди. У ўз чиқиши чоғида Лондон шартларига кўра, ЕИни ислоҳ қилиш ҳақидаги келишувни депутатларга таништирди. Келишув Евроиттифоқнинг 19 февралдаги саммитида маъқулланганди.
Унинг айтишича, баъзи одамлар ЕИ таркибидан чиқишни истамоқда, аммо аслида улар бу овоз беришдан иттифоқда қолиш учун фойдаланмоқчи.
«ЕИда аъзо бўлиб қолиш бўйича иккинчи музокаралар ва иккинчи референдум бўлмайди», — деб қайд этди бош вазир. Унинг ўзи Британиянинг ЕИ таркибида қолиши тарафдори ҳисобланади.
Кэмероннинг баёноти Лондон мэри Борис Жонсонга ўзига хос жавоб бўлди. Жонсон куни кеча бош вазирни қўллаб-қувватламаслиги ва кишиларни Евроиттифоқдан чиқишга даъват этишини таъкидлаганди. Аммо баъзи сиёсатчилар унинг баёнотида Брюссель билан муносабатларни бузишни эмас, 23 июндаги референдумда сайловчиларни аъзоликка қарши овоз беришга кўндириб, кейинроқ Лондон учун янада қулай шартлар асосида ЕИ билан музокара олиб бориш истагини кўрди.
Изоҳ (0)