АҚШнинг Нью-Йорк шаҳрида ўтказилган Westminster Kennel Club Dog Show нуфузли кўргазмасида калта юнгли немис пойнтери зотига мансуб Си Жей лақабли ит ғолиб бўлди. Бу ҳақда «ТАСС» хабар қилмоқда.
Ҳар-хил зотга мансуб бўлган 2,7 мингдан зиёд ит иштирок этган икки кунлик кўргазма Мадисон Square Garden спорт ва кўнгилочар мажмуасида 140-маротаба бўлиб ўтди. Тўрт оёқли конкурс иштирокчиларининг ташқи кўриниши, жисмоний қуввати ҳамда хўжайинининг буйруқларини бажаришга тайёр эканлигига қараб баҳо берилди.
Кўргазманинг якуний босқичида Калифорния штатидан етиб келган 3 ёшли Си Жей билан бирга немис овчаркаси, булдог, ши-ссу ва скайтерер зотига мансуб бўлган итлар ғолиблик учун кураш олиб борди. Шарафли иккинчи ўрин Люси лақабли този итга насиб қилди.
Мукофот тариқасида чемпионга кумуш ликопча тақдим этилди. Итнинг эгаси эса пуллик ёки бошқа мукофот билан тақдирланиши назарда тутилмаган. Анъанага кўра, Си Жейга яқин кунларда Нью-Йоркнинг энг яхши ресторанларининг бирида стейк (бир бўлак лаҳм гўшт) таклиф қилинади ва шундан кейин ит «нафақага чиқиб», итлар кўргазмасида такроран иштирок эта олмайди.
Westminster Kennel Club Dog Show кўргазмаси 1877 йилдан буён Нью-Йоркда ҳар йили ўтказилади.