Челябинск метеоритидан каттароқ астероид Ерга 5 март куни яқин келади

2013 ТХ68 астероиди 5 март куни Ерга нисбатан яқинликда учиб ўтади, деб ёзади «ТАСС».

NASA мутахассислари фикрича, тўқнашиш хавфи йўқ, аммо астероид сайёрага қанчалик яқин масофада учиб ўтиши борасидаги ҳисоб-китоблар бир-биридан фарқ қилмоқда. Прогнозлардан бирига кўра, астероид 14 миллион км — Ер ва Ой ўртасидаги масофадан 35 марта каттароқ масофада учиб ўтади. Яна бошқа тахминларга кўра, у 17 минг км наридан ўтади, бу геостационар йўлдошлар орбитасига тўғри келади.

Бир-биридан фарқли баҳолар берилишига сабаб олимлар астероид ҳақида етарлича маълумотга эга эмаслигидадир. У 2013 йилда аниқланган бўлиб, ўшанда олимлар уни уч кун давомида кузатишга улгурган.

Дастлабки ҳисоб-китобларга кўра, астероид диаметри тахминан 30 метрга тенг. National Geographic таъкидлашича, ушбу осмон жисми Челябинскка 2013 йил 15 февралда қулаган астероиддан каттароқдир.