AQShdagi nufuzli ko‘rgazmada Si Jey laqabli nemis poynteri g‘olib bo‘ldi
AQShning Nyu-York shahrida o‘tkazilgan Westminster Kennel Club Dog Show nufuzli ko‘rgazmasida kalta yungli nemis poynteri zotiga mansub Si Jey laqabli it g‘olib bo‘ldi. Bu haqda “TASS” xabar qilmoqda.
Har-xil zotga mansub bo‘lgan 2,7 mingdan ziyod it ishtirok etgan ikki kunlik ko‘rgazma Madison Square Garden sport va ko‘ngilochar majmuasida 140-marotaba bo‘lib o‘tdi. To‘rt oyoqli konkurs ishtirokchilarining tashqi ko‘rinishi, jismoniy quvvati hamda xo‘jayinining buyruqlarini bajarishga tayyor ekanligiga qarab baho berildi.
Ko‘rgazmaning yakuniy bosqichida Kaliforniya shtatidan yetib kelgan 3 yoshli Si Jey bilan birga nemis ovcharkasi, buldog, shi-ssu va skayteryer zotiga mansub bo‘lgan itlar g‘oliblik uchun kurash olib bordi. Sharafli ikkinchi o‘rin Lyusi laqabli tozi itga nasib qildi.
Mukofot tariqasida chempionga kumush likopcha taqdim etildi. Itning egasi esa pullik yoki boshqa mukofot bilan taqdirlanishi nazarda tutilmagan. An’anaga ko‘ra, Si Jeyga yaqin kunlarda Nyu-Yorkning eng yaxshi restoranlarining birida steyk (bir bo‘lak lahm go‘sht) taklif qilinadi va shundan keyin it “nafaqaga chiqib”, itlar ko‘rgazmasida takroran ishtirok eta olmaydi.
Westminster Kennel Club Dog Show ko‘rgazmasi 1877-yildan buyon Nyu-Yorkda har yili o‘tkaziladi.
