Диний адабиётларнинг республика ҳудудига ноқонуний тарзда олиб кирилишининг олдини олиш мақсадида Бухоро вилояти божхона бошқармаси томонидан доимий чора-тадбирлар олиб борилмоқда. Бу ҳақда Бухоро вилояти божхона бошқармаси Ахборот хизмати «Дарё»га хабар берди.
2015 йил давомида вилоят божхоначилари ҳуқуқни муҳофаза қилувчи бошқа идоралар вакиллари билан ҳамкорликда 127 та божхона қоидабузарликларини фош қилиб, 8,7 минг донадан ортиқ турли шаклдаги диний адабиётларнинг яширин тарзда олиб ўтилишига чек қўйди.
Жумладан, Бухоро халқаро аэропортида Москва—Бухоро йўналиши бўйича парвозини якунлаган фуқаронинг қўл юклари божхона назоратидан ўтказилганда, унга тегишли ноутбук хотирасида 17 дона диний мазмундаги видеолавҳалар мавжудлиги аниқланди. Экспертларнинг хулосасига кўра, мазкур видеофайллар диний ақидапарастлик ғоялари билан йўғрилган ва уларни Ўзбекистон Республикасига олиб кириш, тайёрлаш ва тарқатиш тақиқланганлиги маълум бўлди.
Диний адабиётларни олиб кириш бўйича амалдаги тартибларга риоя қилмаган ушбу шахс Ўзбекистон Республикасининг Жиноят кодексининг тегишли моддаси билан айбли деб топилди ва жазо тариқасида 3 йил муддатга ойлик иш ҳақининг 30 фоизи миқдорида давлат даромади ҳисобига ундирилиб боришлик шарти билан аҳлоқ тузатиш ишлари жазоси тайинланди.
Эслатиб ўтамиз, «Виждон эркинлиги ва диний ташкилотлар тўғрисида» ги Қонуннинг 19-моддасига мувофиқ, чет элда нашр этилган диний адабиётларни олиб келиш ва тарқатиш, уларнинг мазмуни қонун ҳужжатларида белгиланган тартибда экспертизадан ўтказилганидан кейингина амалга оширилади. Бундай адабиётларни олиб келиш, сотиш ва тарқатишга Вазирлар Маҳкамаси ҳузуридаги Дин ишлари бўйича қўмитанинг рухсати билан йўл қўйилади.
Олдинроқ Ўзбекистон божхоначилари 2015 йил давомида 6 мингдан зиёд беҳаё мазмундаги материалларнинг олиб ўтилишига чек қўйгани хабар берилганди.
Изоҳ (0)