Тошкентда бир йилда 150 нафар автобус ҳайдовчиси ишдан бўшатилди
Тошкентда 2015 йил давомида йўл ҳаракати қоидаларига етарли даражада амал қилмаган 150 нафар автобус ҳайдовчиси ишдан бўшатилди. Бу ҳақда, «Тошшаҳартрансхизмат» акциядорлик компанияси Йўл ҳаракати хавфсизлиги хизмати бошлиғи Фарҳод Ниғмоновга асосланиб, «Даракчи» газетаси хабар берди.
Фарҳод Ниғмоновнинг таъкидлашича, 2015 йилда Тошкент шаҳрида жамоат транспорти ҳайдовчилари айби билан содир этилган 4 мингдан ортиқ йўл-транспорт ҳодисаси рўйхатга олинган бўлиб, айбдорларга нисбатан маъмурий жарималар қўлланилган.
«Такроран қоидабузарликларни содир этган ҳайдовчилар эса ишдан бўшатилди», — дейди Фарҳод Ниғмонов.
Маълумотларга кўра, 2015 йилда Тошкент шаҳрида автобус ҳайдовчилари иштирокида содир этилган қоидабузарликлар 37,6 фоизга, оғир оқибатларга сабаб бўлган йўл-транспорт ҳодисалари сони эса етти бараварга камайган.
