Қозоғистон президенти Нурсултон Назарбоев Остона бозорларига чиқиб, маҳсулотларнинг нархларини таққослади. Бу ҳақда у «Нур Отан» партиясининг навбатдан ташқари йиғилишида маълум қилди, деб хабар беради Tengrinews.
«Мен бундан олдин атайлаб бозорга чиқдим. Остонанинг бир нечта бозорларини кўриб чиқдим. Мана асосий озиқ-овқат маҳсулотларининг нархлари: мол гўшти ўтган йилнинг январь ойида 1470 тенге турган бўлса, ҳозир 1150 тенге. От гўшти ўшанда 1600 тенге, ҳозир – 1400; нон 108 тенге бўлган, 108 тенгелигича қолган. Сут 2015 йилда 199 тенге, ҳозир – 175 тенге; ёғ аввал 1500, бугун – 1300. Бу ерда бутун бир рўйхат бор, ҳаммасини айтиб ўтирмайман: макарон 257 тенге бўлган, ҳозир – 170. Картошка 96 тенге бўлган, ҳозир – 80 тенге. Яна нималарни кўпроқ истеъмол қиламиз? Карам 96 тенге бўлган, ҳозир – 107 тенге. Помидор 600 бўлган, ҳозир 850 тенге», — деди Назарбоев.
Давлат раҳбари, шунингдек, қурилиш материалларининг нархларига тўхталиб ўтди.
«Қозоғистоннинг ўзида ишлаб чиқарилаётган барча маҳсулотлар қимматлашиши мумкин эмас. Четдан келтирилаётган нарсаларни эса ҳали қараб чиқиш лозим», — деб таъкидлади президент.
Изоҳ (0)