Тошкентнинг Содиқжон Толипов кўчасида автобус йўлнинг қарама-қарши қатнов қисмига чиқиб, йўловчиларни туширди. Бу ҳақда Facebook’даги «Водители Ташкента» гуруҳида фотохабар қолдирилган.
Фотохабар муаллифи дастлаб тирбандликда турган автомобиллардан бири (Chevrolet Spark, давлат рақами 01 D 919 RA) йўлнинг қарама-қарши қатнов қисмига чиқиб олганидан норозилик билдирган, сўнг қарама-қарши қатнов қисмига чиқиб, йўловчиларни тушираётган автобус суратини илова қилган (суратда автобус йўналиш ва давлат рақами аниқ кўринмаган).
Фотохабар остида фикр билдирган фойдаланувчиларнинг баъзилари авваллари автобуслар тажрибали ҳайдовчиларга ишониб топширилгани, ҳозирги ёш ҳайдовчилар эса турли қандай хоҳласа, шундай ҳайдовчилик қилаётгани, ҳатто шаҳар ичида бир-бири билан пойга ўйнаётганидан нолиган.
Фойдаланувчилардан бири ярим ҳазил, ярим чин қилиб: «Балки йўловчилардан бирортаси тирбандликда тургиси келмай, тушишни хоҳлагандиру, автобус ҳайдовчиси эшикни очиб бергандир», — деб фикр билдирган.
Маълумот учун, Маъмурий жавобгарлик тўғрисидаги кодекснинг 128-5-моддаси («Транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши») 2-қисмига кўра, транспорт воситалари ҳайдовчиларининг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши энг кам иш ҳақининг 10 баравари (22 январь ҳолатига кўра — 1 302 400 сўм) миқдорида жаримага сабаб бўлади.
Изоҳ (0)