Тошкентда тунги клуб менежери мижоз томонидан отилган “хлопушка” сабаб кўзидан оғир жароҳат олгани ҳақида хабар берилганди. Пойтахт ИИББ ҳолат юзасидан маълумот берди.
Унда келтирилишича, 17 июль куни тахминан соат 02:00 ларда Яшнобод туманидаги тунги клубларнинг бирида, 1980 йилда туғилган А.Р. шу клубнинг ишчиси 2000 йилда туғилган М.К.нинг юз қисмига пақилдоқ (хлопушка) отган.
Оқибатда фуқаро “кўз олмаси оғир даражали контузияси, юқори қовоқ, бурун юзаси ва пешона соҳаси юмшоқ тўқималари лат ейиши ҳамда шилинган жароҳати” ташхиси билан шифохонага олиб борилган. Ҳозирда бемор шифокорлар назоратига олинган.
Мазкур ҳолат юзасидан Яшнобод тумани ИИО ФМБ томонидан терговга қадар текширув ўтказилмоқда, якуни бўйича қонуний қарор қабул қилиниши таъминланади.
Февраль ойида Фарғонада компьютер клубида жанжал кўтарган шахслар қамоққа олинган эди. 21 февраль куни Фарғона шаҳар Офтоб кўчасида жойлашган компьютер ўйинлари клубида етти нафар танишлар ўзаро бақир-чақир қилиб компьютер ўйнагани учун клуб иш бошқарувчиси Ф.Худойназаров томонидан уларга эътироз билдирилган. Натижада ўзаро келишмовчилик сабабли фуқаро О.Валломов уни калтаклаган, жанжалга унинг шериклари ҳам қўшилган.
Ўзбекистонда 2024 йилда 469 568 киши маъмурий жавобгарликка тортилган. Кўрилган маъмурий ҳуқуқбузарлик тўғрисидаги ишларнинг аксариятини майда безорилик каби ҳуқуқбузарликлар бўлган. 2024 йилда жиноят ишлари бўйича судлар томонидан 77 995 нафар шахсга нисбатан 61 481 та жиноят иши кўриб чиқилган. Судланганлар сони 61 502 нафарни ташкил этиб, шундан 20 659 кишига озодликдан маҳрум қилиш ва 39 763 нафарига бошқа турдаги жазолар тайинланган, 1 080 нафар шахс шартли ҳукм қилинган.
Изоҳ (0)