Toshkentning Sodiqjon Tolipov ko‘chasida avtobus yo‘lning qarama-qarshi qatnov qismiga chiqib, yo‘lovchilarni tushirdi. Bu haqda Facebook’dagi “Voditeli Tashkenta” guruhida fotoxabar qoldirilgan.
Fotoxabar muallifi dastlab tirbandlikda turgan avtomobillardan biri (Chevrolet Spark, davlat raqami 01 D 919 RA) yo‘lning qarama-qarshi qatnov qismiga chiqib olganidan norozilik bildirgan, so‘ng qarama-qarshi qatnov qismiga chiqib, yo‘lovchilarni tushirayotgan avtobus suratini ilova qilgan (suratda avtobus yo‘nalish va davlat raqami aniq ko‘rinmagan).
Fotoxabar ostida fikr bildirgan foydalanuvchilarning ba’zilari avvallari avtobuslar tajribali haydovchilarga ishonib topshirilgani, hozirgi yosh haydovchilar esa turli qanday xohlasa, shunday haydovchilik qilayotgani, hatto shahar ichida bir-biri bilan poyga o‘ynayotganidan noligan.
Foydalanuvchilardan biri yarim hazil, yarim chin qilib: “Balki yo‘lovchilardan birortasi tirbandlikda turgisi kelmay, tushishni xohlagandiru, avtobus haydovchisi eshikni ochib bergandir”, — deb fikr bildirgan.
Ma’lumot uchun, Ma’muriy javobgarlik to‘g‘risidagi kodeksning 128-5-moddasi (“Transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqishi”) 2-qismiga ko‘ra, transport vositalari haydovchilarining yo‘lning qarama-qarshi harakatlanish uchun mo‘ljallangan tomoniga yoki bo‘lagiga yo‘l harakati qoidalarini buzgan holda chiqishi eng kam ish haqining 10 baravari (22 yanvar holatiga ko‘ra — 1 302 400 so‘m) miqdorida jarimaga sabab bo‘ladi.
Izoh (0)