Тошкентнинг Братислава кўчасида (Бобур номидаги маданият ва истироҳат боғи ёнида) «шошаётгани учун» йўлнинг қарама-қарши қатнов қисмига чиқиб, тирбандликни айланиб ўтмоқчи бўлган Matiz’га йўл берилмади. Ҳодиса видеоёзуви Mover хизматига жойлаштирилган.
Видеода Шота Руставели кўчасидан Братислава кўчасига кирган автомобиль қаршисидан, қоидаларга зид равишда йўлнинг қарама-қарши қатнов қисмидан ҳаракатланиб келган, давлат рақами 01 K 093 SA бўлган Matiz чиқиб келганини кўриш мумкин.
Видеоёзувни жойлаштирган фойдаланувчи Matiz ҳайдовчисига йўл бермаган, у бурилиб ўтиб кетмоқчи бўлганида эса, оралиқ масофани қисқартириб, Matiz’нинг ҳаракатланишига имкон қолдирмаган. Шундан сўнг қоидабузар ҳайдовчи автомобилдан тушиб, «йўлтўсар»га ниманидир тушунтирмоқчи бўлган, «шошаяпман» деб айтган.
Видео муаллифининг қайд этишича, Matiz ҳайдовчиси «даҳанаки жанг»га киришган вақтда тирбандликда навбатини кутаётган милиция ходими унга танбеҳ берган, ҳодиса гувоҳига айланган бошқа бир ҳайдовчи эса «йўлтўсар»ни: «Баракалла, укам! Охиригача йўл берма, барибир ҳеч нарса қила олмайди», — деб қўллаб-қувватлаган.
Охир-оқибат, Matiz ҳайдовчиси машинасига ўтириб, тирбандликдаги машиналар қаторига қўшилишга мажбур бўлган. Видео остида фикр билдирган фойдаланувчилар «йўлтўсар»нинг бу ҳаракатини маъқуллаган, Matiz ҳайдовчисини танқид остига олган.
Маълумот учун, Маъмурий жавобгарлик тўғрисидаги кодекснинг 128-5-моддаси («Транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши») 2-қисмига кўра, транспорт воситалари ҳайдовчиларининг йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши энг кам иш ҳақининг 10 баравари (22 январь ҳолатига кўра — 1 302 400 сўм) миқдорида жаримага сабаб бўлади.
Изоҳ (0)