2026 йилдан бошлаб АҚШда барча тоифадаги ноиммиграцион визалар, жумладан, сайёҳлик (B-1/B-2), талабалар (F/М), иш (H-1B) ва алмашинув дастурлари (J) визалари учун камида 250 доллар миқдорида қўшимча виза йиғими жорий этиш режалаштирилмоқда.
Янги тўлов 2025 йил 4 июлда имзоланган Оne Big Beautiful Bill Act қонунида белгиланган. Унга кўра, сумма АҚШ Ички хавфсизлик вазирлиги қарорига биноан оширилиши мумкин ва ҳар йили инфляцияни ҳисобга олган ҳолда қайта кўриб чиқилади.
Ҳозирда мамлакатда 185 доллар миқдоридаги виза божи амал қилмоқда. Шундай қилиб, мажбурий йиғимларнинг умумий миқдори ҳар бир киши учун камида 435 долларни ташкил этади. Ариза берувчининг ёши, сафар мақсади ёки бошқа ҳолатларга қараб истиснолар назарда тутилмаган.
Тўланган сумма бир қатор шартлар бажарилганда, жумладан виза режимига риоя қилиш, ноқонуний меҳнат фаолияти билан шуғулланмаслик, мамлакатни ўз вақтида тарк этиш (виза муддати тугаганидан кейин беш кундан кечиктирмай), шунингдек, АҚШда бўлиш мақоми ўзгарганда ёки узайтирилганда қайтарилиши мумкин. Бироқ қайтариш тартиби ҳали расман белгиланмаган.
Бундан ташқари, бошқа миграция ва виза тартиб-қоидалари, жумладан, кириш учун рухсатнома (ESТА) олиш, вақтинчалик ҳимояга ариза бериш, қочқин мақомини олиш ва уларни узайтириш учун тўловлар ҳам жорий этилмоқда.
Мутахассисларнинг ҳисоб-китобларига кўра, сайёҳлик визасини олишнинг умумий қиймати 450-470 долларгача кўтарилиши мумкин, бу ҳозирги қийматдан 2,5 баравар кўпдир. Янги тўловдан ташқари, бошқа тегишли тўловлар, жумладан, I-94 шакли учун тўлов (24 доллар) ва ESТА нархи (21 доллар ўрнига 40 доллар) ҳам оширилмоқда.
Иш визаларидан фаол фойдаланаётган Америка IT-компаниялари аллақачон ташвиш билдирмоқда. Уларнинг фикрича, тўловларнинг ошиши мутахассисларни ёллаш харажатларини кўпайтиради ва истеъдодли кадрларни жалб қилишни қийинлаштиради.
Изоҳ (0)