Жорий йил 21 июль куни Голливудда Илон Маскнинг узоқ кутилган лойиҳаси — Tesla Diner & Drive-In ресторани расман иш бошлади. Ретро-футуристик услубда безатилган бу инновацион маскан нафақат ресторан, балки автомобиль ҳайдовчилари учун кинотеатр, қувватлаш станцияси ва технологик тажриба майдонидир.
Ресторан ҳақида
Tesla Diner ташқи кўринишидан 1950 йиллардаги классик Америка тамаддихоналари кўринишида яратилган. Бироқ унинг интерери замонавий технологиялар билан тўла. Меҳмонларни Tesla'нинг гуманоид роботи — Optimus кутиб олади, баъзан у попкорн тарқатишда хизмат қилади.
Буюртмалар Tesla машиналарининг экранлари орқали берилади, тизим эса геолокация ёрдамида мижоз машинаси 15 дақиқа олдин етиб келишини аниқлаб, таомни тайёрлаб қўяди.
Фото: Reddit
Авто кинотеатр ва электр қувватлаш шохобчаси
Tesla Diner иккита йирик LED экранга эга бўлиб, автомобилдан тушмасдан туриб кино кўриш имконини беради. Экранларда 30 дақиқа давом этадиган қисқа видеоконтентлар намойиш қилинади. Шунингдек, ресторан ҳудудида 80 та автомобиль учун мўлжалланган Supercharger зарядлаш станцияси ҳам жойлашган.
Ресторан ичидаги кичик музей
Ресторанда Tesla тарихига оид экспонатлар ва турли сувенирлар намойиш этилган. Шунингдек, махсус дўконда Optimus робот шакллари, Tesla логотипли футболкалар ва кепкаларни харид қилиш мумкин.
Илон Маск Tesla Diner'ни “Лос-Анжелесдаги энг зўр жойлардан бири” деб атади ва келажакда компания бундай ресторанларни бутун дунё бўйлаб энг йирик шаҳарларда зарядлаш станциялари билан биргаликда очиши мумкинлигини маълум қилди.
Илк бор Маск Tesla ресторанини очиш нияти борлигини 2018 йилда билдирган. Лос-Анжелесдаги Tesla Diner қурилиши эса 2023 йил кузида бошланган.
Изоҳ (0)