Новосибирск вилоят клиник касалхонаси жарроҳлари ноёб амалиёт — бир жигарни икки мижозга кўчириб ўтказишга (сплит-трансплантация) қўл урди. Бу ҳақда вилоят ҳукумати матбуот хизмати маълум қилди, дея хабар беради «РИА Новости».
«Амалиётнинг ўзига хос хусусияти шундаки, бир донорлик органидан икки нафар катта ёшли мижозлар учун фойдаланилди. Вилоят касалхонаси жарроҳлари жигар донорнинг вужудида иккига ажраладиган in situ splitting технологиясини қўллади. Олинган қисмлар трансплантацияга муҳтож беморларга кўчириб ўтказилди», — дейилади мазкур хабарда.
Дунёда сплит-трансплантация технологиясидан донорлик органлари танқислиги туфайли фойдаланилмоқда. Икки инсоннинг ҳаётини сақлаб қолиш учун донор жигари ўта сифатли бўлиши, қисмларга ажралгандан сўнг ҳам ўз вазифасини тўлақонли бажариши талаб этилади.
Олдинлари Россияда бу технология фақат «бола ва катта ёшли киши» жуфтлигида қўлланилган, икки нафар катта ёшдаги инсонлар учун эса фақат бир марта, 2014 йилда синаб кўрилганди.
Изоҳ (0)