Шимолий Дакотадаги нефть нархи 0 доллардан ҳам тушиб кетди

Flint Hills Resources компанияси, агар унга ҳар баррели учун 0,5 доллардан тўлашса, North Dakota Sour туридаги нефтни олишга розилигини билдирди. Bloomberg’нинг қайд этишича, 2014 йил январида бу турдаги нефть нархи 47,6 долларга тенг эди, 2015 йил январигача эса унинг бир баррели 13,5 долларгача арзонлашди.

North Dakota Sour нефтнинг сифати ҳаддан ташқари паст, олтингугурт миқдори кўп бўлган тури ҳисобланади. Далласдаги Turner Mason компанияси вице-президенти Жон Ауэрснинг сўзларига кўра, Enbridge компанияси 2011 йилдан ўз қувурлари орқали олтингугурт миқдори кўп бўлган нефтни ўтказишни тўхтатиб қўйган ва шу сабабли уни юк машиналари ва темирйўл ёрдамида олиб чиқишга тўғри келмоқда, бу эса харажатларни ошишига сабаб бўлмоқда.

Шимолий Дакотада бир кунда қазиб олинаётган нефтнинг фақат 15 минг баррели North Dakota Sour улушига тўғри келади. Таққослаш учун, штатнинг ғарбий қисмида жойлашган Баккен сланец конида кунига 1,1 миллион баррель нефть қазиб олинмоқда — бу нефть таркибида олтингугурт миқдори кам.

Таркибида олтингугурт миқдори кўп бўлган нефть тури нисбатан арзон туради, чунки уни қайта ишлаш учун махсус асбоб-ускуна керак. Bloomberg’нинг қайд этишича, 2015 йили нефть ва газ қазиб олиш бўйича Канаданинг маркази ҳисобланган Эдмонтонда уч ой давомида пропан манфий нархда сотилди, яъни, сотувчилар маҳсулот олинаётгани учун харидорга пул тўлади.

Ауэрснинг фикрича, агар ишлаб чиқарувчи ундан нефтни сотиб олишлари учун харидорга пул тўлашга мажбур бўлаётган бўлса, унинг олдида фақат бир йўл қолади — нефть қазиб олишни тўхтатиш керак.