Россия ОАВлари ва блогларида 2015 йил охирида бошқа мамлакатлар Россиянинг душмани сифатида тилга олиниши билан боғлиқ ҳолат ўзгарди, дея хабар бермоқда «Газета.ru» «Медиалогия» компанияси тадқиқотларига таяниб.
Йилнинг дастлабки тўққиз ойи давомида Украина Россия учун хавф сифатида тилга олиниш бўйича биринчи ўринда бўлган. Иккинчи ўринни АҚШ эгаллаган.
Бироқ йил охирига келиб, Киевнинг душман сифатида тилга олиниши камайди. Россиянинг Суриядаги ҳарбий операцияси бошлангач, душман сифатида кўпроқ ИШИД айтиб ўтила бошлади. Аммо террорчиларнинг «биринчилиги» икки ой давом этди, холос.
Йил охирида ОАВлар ва блоглар талқинига кўра Россиянинг янги «бош душмани» аниқланди. Су-24 самолёти билан боғлиқ ҳодисадан сўнг у Туркия бўлди. Мақолада айтилишича, авваллари Туркия террорчилик контекстида ҳафтасига тахмина 20 марта тилга олинган бўлса, 24 ноябрдан сўнг бу кўрсаткич 150 тагача етди.
Изоҳ (0)