Австралиянинг икки вазири Гонконгдаги барга бориб келгач, истеъфо берди

Австралия ҳукуматининг икки вазири Гонконгдаги оммабоп барга бориб келгач, истеъфо берди, дея хабар бермоқда Reuters.

Вазирлар барга мамлакатга расмий ташрифи давомида кечки пайт борган. Ушбу барга ташриф буюрган аёллардан бири шаҳарлар ва антропоген муҳит бўйича вазир Жейми Бриггс унга нисбатан номақбул муносабатда бўлганини айтган.

«Мен бевосита ундан узр сўрадим, бироқ чуқур ўйлаб шуни тушундимки, менинг хулқим юқори стандартларга мос бўлмади», — деди Бриггс журналистларга. Воқеадан сўнг у истеъфо берди.

Вазир бардаги ҳодиса ҳақида батафсил сўзлаб беришдан бош тортди, бироқ «қонунга зид нарса» қилмаганини таъкидлади.

Яна бир вазир — Мал Бро ҳам ҳодисада иштирок этган. Полиция унинг воқеадаги ролини текширмоқда, шунга қарамай, у ҳам ўз лавозимини тарк этишга қарор қилди.

Вазирларнинг аризалари вазирлар маҳкамасининг яқин орада бўлиб ўтадиган мажлисида кўриб чиқилади.