Туркия президенти Ражаб Тоййиб Эрдўғон Истанбул марказида ўз жонига қасд этмоқчи бўлган эркакни тўхтатиб қолди. CNN Turk телеканалининг маълум қилишича, давлат раҳбарининг шахсан ўзи уни кўприкдан ташламасликка кўндирган, дея хабар беради «РБК».
Эрдўғон ҳазрат Али масжидидан президент саройига қайтаётганда Босфор кўпригида ўзини бўғозга ташламоқчи бўлган эркак олдида тўпланган оломонни кўриб қолади. Президент «Мерседес»ининг очиқ ойнаси орқали уни бу ниятидан қайтишга чақиради. Журналистлар эркак кўприк панжараси олдидан узоқлашиб, Эрдўғоннинг олдига келган ва қутқаргани учун миннатдорчилик билдираётган чоғда суратга туширди. Президент бу пайтда смартфонда гаплашаётган бўлган.
Туркия шарқидаги Сирт шаҳрида яшаган эркакни оилавий муаммолар ва тушкунликлар ўз жонига қасд этишга мажбур қилгани маълум бўлди. Эрдўғоннинг автомобиллари кортежи келгунча полициячилар икки соат давомида уни бу ниятидан қайтармоқчи бўлган, бироқ уддасидан чиқолмаганди.
Изоҳ (0)