«Яндекс» собиқ ходими қидирув тизими бошланғич кодини ўғирлагани учун судланди

Москванинг Тушинский тумани суди «Яндекс» компаниясининг собиқ ходими Дмитрий Коробовни интеллектуал мулкларни ўғирлашда айбдор деб топди ва шартли равишда икки йилга озодликдан маҳрум қилди, дея хабар бермоқда «Коммерсантъ».

Коробов сервердан қидирув тизимининг бошланғич коди ва алгоритмларини ўз ичига олган «Аркадия» дастурий таъминотини кўчириб олиб, уларни сотишга уринган. У махфий маълумотни «НИКС корхонаси» компаниясига таклиф қилган, шунингдек, уни даркнетда ва хакерлик форумларида сотишга ҳаракат қилган, у ерда у Федерал хавфсизлик хизмати эътиборига тушган.

Ўғирланган интеллектуал мулк учун Дмитрий Коробов 25 минг доллар ва 250 минг рубль (тахминан 3,5 минг доллар) нарх белгилаган, сўнг харидорга учрашиш жойи ва вақтини айтган. Олди-сотди қилмоқчи бўлганида эркак ФХХ ходимлари томонидан қўлга олинган.