Зимбабвенинг мухолифатдаги «Демократик ўзгаришлар учун ҳаракат» партияси (MDC) раҳбари Морган Свангираи мамлакат президенти Роберт Мугабенинг рафиқаси Грейс Мугабе давлат бошқарувини қўлга олганини маълум қилди. Унинг таъкидлашича, Грейс деярли мамлакат президенти вазифасини бажармоқда, маҳаллий ҳукумат эса фалажлик ҳолатига тушиб қолган. Бу ҳақда Guardian манбаларига таяниб, «РИА Новости» хабар бермоқда.
Нашрнинг таъкидлашича, Грейс Мугабе кейинги пайтда Зимбабве сиёсий ҳаётида нуфузли шахсга айланган: ўтган йил декабрида у мамлакат ҳукмрон партиясидаги муҳим лавозимлардан бирини эгаллаганди. Бироқ ортиб бораётган нуфузига қарамай, қимматбаҳо буюмлар харид қилиш учун хорижга тез-тез сафар уюштирадиган Грейснинг иқтисодий қийинчиликлардан боши чиқмаётган мамлакат аҳолиси орасидаги обрўси жуда паст.
Зимбабве президенти Роберт Мугабе дунёдаги энг кекса амалдаги давлат раҳбари саналади. У 2018 йили, 94 ёшга тўлганида ҳам президентлик сайловларида иштирок этиш ниятида.
Изоҳ (0)