Россия президенти Владимир Путин Чеченистон раҳбари Рамзан Қодировнинг республикага икки йирик нефть қазиб олувчи активларидан бири — «Чеченнефтехимпром»ни бериш тўғрисидаги таклифини қўллаб-қувватлади. Президентнинг бу борадаги кўрсатмаси ва тегишли ҳужжат лойиҳалари ҳукумат томонидан кўриб чиқилмоқда, дея хабар беради «РБК».
Ҳозирда «Чеченнефтехимпром» тўлиқ Россия давлат мулкини бошқариш федерал агентлигига (Росимушество) тегишли, уни ижара асосида «Роснефть» компанияси бошқаради. Рамзан Қодиров давлат раҳбарига йўллаган мактубида «Чеченнефтехимпром»нинг нефть қазиб олиш билан боғлиқ бўлмаган имкониятлари — ер захиралари ва инфраструктураси деярли фойдаланилмаётгани, чечен раҳбарияти бу ерда 2014 йили тузилган шартномага мувофиқ Кореянинг КОКАМ компанияси билан ҳамкорликда литий-ионли аккумуляторлар ишлаб чиқариш заводини қуриш ниятида эканини билдирган.
Қодиров «Чеченнефтехимпром» 2014–2016 йилларнинг хусусийлаштириш прогноз режасига киритилгани мазкур ва келгуси йилларга мўлжалланган бошқа лойиҳаларни амалга оширишни шубҳа остига қўйишини таъкидлаб, ушбу тузилмани республика ихтиёрига беришни сўраган.
Изоҳ (0)