АҚШнинг Хьюстон шаҳрида оғир атлетика бўйича катталар ўртасида ўтказилаётган жаҳон чемпионатида тўртта вазн тоифасида ғолиб ва совриндорлар номи маълум бўлди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Жумладан, эркаклар ўртасида вазни 56 килограммгача бўлган спортчилар мусобақасида барча совринли ўринлар Осиё вакилларига насиб этди. КХДР вакили Ом Юн Чол умумий 302 кг натижа (даст кўтаришда — 131 кг, силтаб кўтаришда — 171 кг) билан биринчи ўринни эгаллаган бўлса, хитойлик спортчи иккинчи, Вьетнам терма жамоаси аъзоси эса учинчи бўлди.
Ўзбекистонлик Адҳамжон Эргашев иштирок этган вазни 62 килограммгача бўлган полвонлар мусобақасида хитойлик Чен Лижун даст кўтаришда 150 кг, силтаб кўтаришда эса 183 кг тошни ўзига бўйсиндирди ва иккикураш якунларига кўра 333 кг натижа билан биринчи ўринни эгаллади.
Даст кўтаришда 122 кг, силтаб кўтаришда эса 156 кг тошни ўзига бўйсундира олган Адҳамжон Эргашев умумий 278 кг кўрсаткич билан 22-ўринни эгаллади.
Хотин-қизлар мусобақасида ҳам икки вазн тоифасида ғолиб ва совриндорлар номи маълум бўлди. Ўзбекистонлик Марина Сисоева ҳамда Лола Қодирова вазни 53 килограммгача бўлган спортчилар баҳсида иштирок этган. Ғолибликни Хитой Тайпейи вакиласи даст кўтаришда 96 кг, силтаб кўтаришда эса 125 кг тошни ўзига бўйсундириб, иккикураш якунига кўра 221 кг натижани қайд этди.
Марина Сисоева даст кўтаришда 88 кг, силтаб кўтаришда эса 112 кг натижа қайд этиб, иккикураш якунига кўра 200 кг кўрсаткич билан 7-ўринни эгаллади. Ушбу вазн тоифасининг «B» гуруҳида иштирок этган Лола Қодирова умумий 183 кг натижа (84 кг – 99 кг) билан 21-ўринни банд этди.
Хотин-қизлар ўртасида 48 кг вазн тоифасида бўлиб ўтган мусобақаларда хитойлик спортчи ғалаба қозонди. Жаҳон чемпионати баҳслари давом этмоқда.
Изоҳ (0)