Тошкентда режиссёр Баҳодир Йўлдошев ҳақидаги китоб тақдимоти бўлиб ўтди

Тошкентда 16 ноябрь, якшанба куни таниқли режиссёр Баҳодир Йўлдошев ҳақидаги китоб тақдимоти бўлиб ўтди. Бу ҳақда «MyTashkent.uz» хабар бермоқда.

«Санъат» нашриёти томонидан 250 тиражда чоп этилган ушбу китобда Баҳодир Йўлдошев билан уюштирилган суҳбатлар, мақолалар, замондошларининг ушбу санъаткор ҳақидаги эсдаликлари ўрин олган.

«Тақдимотда қатнашган актёрлар, режиссёрлар, ёзувчилар, шоирлар, мунаққидлар ва журналистлар чиройли сўзлар айтди, ҳазил-мутойиба қилди, китоб қаҳрамонини табриклади», — деб ёзади «MyTashkent.uz» лойиҳаси раҳбари Евгений Скляревский.

Тадбирда Эркин Аъзам, Усмон Азим каби таниқли ёзувчи ва шоирлар, Иброҳим Ғафуров, Наим Каримов, Шуҳрат Ризаев, Каромат Муллахўжаева каби адабиётшунос ва санъатшунослар, шунингдек, Ўзбекистон ёшлар театри бадиий раҳбари Наби Абдураҳмонов қатнашди.

1945 йил Каттақўрғон шаҳрида туғилган Баҳодир Йўлдошев 1970 йилда Тошкент театр ва рассомлик санъати инстутитини тугатган, 1974 йили — 28 ёшида Ҳамза театри (ҳозирги Ўзбек миллий академик драма театри) бош режиссёри этиб тайинланган. 1984 йилдан Аброр Ҳидоятов номидаги драма театри бош режиссёри сифатида ишлаган. 1979 йили Ўзбекистонда хизмат кўрсатган санъат арбоби, 1995 йили Ўзбекистон халқ артисти унвони билан тақдирланган.

«Рўйхатларда йўқ» (Б. Василев), «Келинлар қўзғолони», «Фармонбиби аразлади» (С. Аҳмад), «Нодирабегим» (Т. Тўла), «Юлдузли тунлар» (П. Қодиров), «Зебуннисо» (Уйғун), «Майсаранинг иши» (Ҳамза), «Қора камар» (Ш. Холмирзаев), «Искандар» (А. Навоий), «Аршин мол олон» (У. Ҳожибеков),«Малика» (Фотима Галер), «Буюк ипак йўли» (М. Бафоев мусиқаси асосида),«Бухоройи шариф» (С. Айний асари асосида), «Тоға-жиянлар» (Р. Бобожон) каби Баҳодир Йўлдошев томонидан саҳналаштирилган энг яхши спектакллар сифатида тилга олинади.

Баҳодир Йўлдошев, шунингдек, Ўзбекистоннинг турли саналарига бағишланган байрам томошаларини саҳналаштирган: «Улуғбек юбилейи» (1994), «Наврўз» (1995), «Амир Темур юбилейи» (1996, Регистон), «Шарқ тароналари» (1997 йилдан 2013 йилгача) шулар жумласидан. Кинода актёр сифатида Олчинбек («Оловли йўллар»), Мухторов («Тоғдаги учрашув»), Шерзод («Олмос камар»), Собиров («Ошпаз») Акахон («Дев билан пакана») каби образлар яратган.