Toshkentda 16-noyabr, yakshanba kuni taniqli rejissor Bahodir Yo‘ldoshev haqidagi kitob taqdimoti bo‘lib o‘tdi. Bu haqda “MyTashkent.uz” xabar bermoqda.
“San’at” nashriyoti tomonidan 250 tirajda chop etilgan ushbu kitobda Bahodir Yo‘ldoshev bilan uyushtirilgan suhbatlar, maqolalar, zamondoshlarining ushbu san’atkor haqidagi esdaliklari o‘rin olgan.
“Taqdimotda qatnashgan aktyorlar, rejissorlar, yozuvchilar, shoirlar, munaqqidlar va jurnalistlar chiroyli so‘zlar aytdi, hazil-mutoyiba qildi, kitob qahramonini tabrikladi”, — deb yozadi “MyTashkent.uz” loyihasi rahbari Yevgeniy Sklyarevskiy.
Tadbirda Erkin A’zam, Usmon Azim kabi taniqli yozuvchi va shoirlar, Ibrohim G‘afurov, Naim Karimov, Shuhrat Rizayev, Karomat Mullaxo‘jayeva kabi adabiyotshunos va san’atshunoslar, shuningdek, O‘zbekiston yoshlar teatri badiiy rahbari Nabi Abdurahmonov qatnashdi.
1945-yil Kattaqo‘rg‘on shahrida tug‘ilgan Bahodir Yo‘ldoshev 1970-yilda Toshkent teatr va rassomlik san’ati instutitini tugatgan, 1974-yili — 28 yoshida Hamza teatri (hozirgi O‘zbek milliy akademik drama teatri) bosh rejissori etib tayinlangan. 1984-yildan Abror Hidoyatov nomidagi drama teatri bosh rejissori sifatida ishlagan. 1979-yili O‘zbekistonda xizmat ko‘rsatgan san’at arbobi, 1995-yili O‘zbekiston xalq artisti unvoni bilan taqdirlangan.
“Ro‘yxatlarda yo‘q” (B. Vasilev), “Kelinlar qo‘zg‘oloni”, “Farmonbibi arazladi” (S. Ahmad), “Nodirabegim” (T. To‘la), “Yulduzli tunlar” (P. Qodirov), “Zebunniso” (Uyg‘un), “Maysaraning ishi” (Hamza), “Qora kamar” (Sh. Xolmirzayev), “Iskandar” (A. Navoiy), “Arshin mol olon” (U. Hojibekov),“Malika” (Fotima Galer), “Buyuk ipak yo‘li” (M. Bafoyev musiqasi asosida),“Buxoroyi sharif” (S. Ayniy asari asosida), “Tog‘a-jiyanlar” (R. Bobojon) kabi Bahodir Yo‘ldoshev tomonidan sahnalashtirilgan eng yaxshi spektakllar sifatida tilga olinadi.
Bahodir Yo‘ldoshev, shuningdek, O‘zbekistonning turli sanalariga bag‘ishlangan bayram tomoshalarini sahnalashtirgan: “Ulug‘bek yubileyi” (1994), “Navro‘z” (1995), “Amir Temur yubileyi” (1996, Registon), “Sharq taronalari” (1997 yildan 2013 yilgacha) shular jumlasidan. Kinoda aktyor sifatida Olchinbek (“Olovli yo‘llar”), Muxtorov (“Tog‘dagi uchrashuv”), Sherzod (“Olmos kamar”), Sobirov (“Oshpaz”) Akaxon (“Dev bilan pakana”) kabi obrazlar yaratgan.
Izoh (0)