2015 йил 9 ноябрь куни INFOLIB—2015 IV Миллий ахборот-кутубхона ҳафталиги доирасида Алишер Навоийнинг «Пятерица изумлений» («Хамсат ул-мутахаййирийн») китобининг рус тилидаги бадиий таржимаси тақдимоти бўлиб ўтди. Бу ҳақда Ўзбекистон Миллий кутубхонаси матбуот хизмати хабар бермоқда.
«Пятерица изумлений» китобининг рус тилидаги таржимаси филология фанлари доктори, навоийшунос олим, хизмат кўрсатган фан арбоби, академик Азиз Қаюмов ва Ўзбекистон жаҳон иқтисодиёти ва дипломатияси университети профессори Динара Азимованинг саъй-ҳаракатлари туфайли амалга оширилди. Алишер Навоийнинг русийзабон китобхонларга авваллари нотаниш бўлган асарларининг таржимаси навоийшуносликда катта воқеа ҳисобланади. «Пятерица изумлений» китоби таржимаси ўрта асрлар мутафаккири, фалсафа, диншунослик ва тарихга доир китоблар муаллифи Абдураҳмон Жомийнинг 600 йиллик таваллудига аталган.
Китобнинг танланиш сабабларига тўхталар экан, академик А.Қаюмов асарнинг ёшлар маънавиятининг ҳар томонлама ривожланишида катта авлодга ҳурмат, иззат кўрсатиш, уларни эъзозлаш руҳида тарбиялашдаги ўрни борасида алоҳида тўхталди. Шунингдек, А.Қаюмов китобнинг моҳияти, Алишер Навоийнинг Жомий асарлари ва илмий фаолиятини таҳлил этганлиги ҳақида ҳикоя қилади ва уларнинг самарали ҳамкорлиги устида тўхталади.
Китобда Алишер Навоий ва Жомий танишувининг асл тафсилотлари ҳикоя қилинади, уларнинг суҳбатлари ва дўстона мулоқотлари ва ўн бешинчи асрнинг иккинчи ярмида Хуросонда бўлиб ўтган тарихий воқеалар таърифланади.
Шунингдек, Алишер Навоий Жомий ижодига даҳлдор китоблар, ўгитлар, унинг назоратида ўқилган асарлар, шарҳлар ҳақида ва устози ва дўстининг ўлимига сабаб бўлган омиллар ва унинг ўлимидан сўнг рўй берган воқеалар тўғрисида ҳикоя қилади.
Изоҳ (0)