Блогер Фарҳод Маннопов ўлими юзасидан Тошкент шаҳар суди жиноят ишлари бўйича судлов ҳайъати апелляция инстанцияси ҳукм чиқарди. “Дарё” танишган суд ҳукмига кўра, Манноповни операция қилган ЛОР-шифокор оқланган.
ЛОР-шифокор оқланди
ЛОР дастлабки суд ҳукмидан норози бўлиб, апелляция шикояти киритган. У асоссиз равишда айбланганини айтиб, оқлов ҳукми чиқаришни сўраган.
Апелляция инстанцияси жорий йил 22 июлда жиноят ишлари бўйича Учтепа туман суди 2024 йил 29 ноябрдаги ҳукмининг ЛОРга оид қисмини бекор қилган.
Шифокор Жиноят кодекси 117-моддаси 2-қисми ҳамда 116-модда 3-қисмида назарда тутилган жиноят юзасидан қилмишида жиноят аломатлари бўлмагани сабаб Жиноят процессуал кодекси 83-моддаси 2 ва 3-бандларига асосан айбсиз деб топилиб оқланди. Жиноят ишининг унга оид қисми тугатилди.
Суд жараёнида ўлим юзасидан қатор масалалар муҳокама этилган. Жумладан, учта мутахассис сўроқ қилинган. Улар операция жараёнида ЛОРда айб бўлмаганини айтган.
Биринчи гувоҳ — Апелляция инстанцияси суди мажлисида қўшимча гувоҳ сифатида Мудофаа вазирлиги МҲКГ Отоларингология бўлими бошлиғи, бош оталаринголог бўлган. Унинг айтишича, бемор ЛОРнинг айби билан ўлмаган. Айнан ринопластика вақтида ЛОР айби билан бемор иситмаси кўтарилиб кетиши амалиётда учрамаган.
Яна бир гувоҳ тариқасида Қуролли кучлар Суд-тиббий экспертиза маркази вакили ҳам сўроқ қилинган. У ўлим жарроҳлик амалиёти жараёнида дори воситасига медикаментоз аллергик реакция натижасида ривожланган анафилактик шок бўлганини айтган. Экспертлар таҳлилига кўра, бу клиник ҳолатда марҳум бурун шиллиқ қаватларига инексия орқали юборилган “Новокаин” маҳаллий анестетик дори воситаси этиологик омил сифатида иштирок этгани эҳтимолдан холи эмас.
Судда яна гувоҳ сифатида Ихтисослаштирилган аллергология илмий-амалий маркази шифокор аллергологи ҳам сўроқ қилинган. Мазкур гувоҳ ҳам ўлим сабабини дори воситасига аллергик реакция оқибатида ривожланган анафилактик шок деб белгилашганини маълум қилган.
Айбдор анестезиолог
Суд ҳукмида келтирилишича, Фарҳод Манноповни “Star Меd Center” хусусий клиникасида операция қилишда қатнашган анестезиолог-реаниматолог шифокор тиббий стандартларни қўпол тарзда бузган. У беморни етарлича текширмаган ва тўғри ташхис қўймаган. Масалан, аллергик рисклар бор-йўқлигини текширмаган. Кардиолог тавсияларини олмаган. Анестезиологик муолажа натижасида юзага келиши мумкин бўлган турли оқибатлар юз берган тақдирда уларни бартараф қилиш чораларини кўрмай, анестезия қўллаш мумкинлигига тавсия берган.
Блогерга 2023 йил 3 март куни соат 13:40 да “Севофлуран” газли наркоз муолажаси қўлланган. Мазкур дори воситасини мия жароҳатлари мавжуд бўлганда қўллаш маън этилган. Фарҳод Маннопов эса бурнидан жиддий жароҳат олгани сабаб клиникага келиб, операцияга рози бўлган.
Анестизиолог жарроҳлик амалиёти вақтида бемор соғлиғига ҳамда ўз касбига бееътибор бўлишда давом этган. Анестезия ўтказишда артериал босим ва юрак қисқаришлари сонини ҳар 5 дақиқадан кам бўлмаган вақтда ўлчаб туриши керак бўлган. Узлуксиз электрокардиоскопик назорат ўтказиш асосий вазифаларидан ҳисобланган. Аммо у операция жараёнида телефонда бир неча дақиқа давомида гаплашиб ўтирган. Суҳбатлар операция жараёнларига боғлиқ бўлмаган.
Натижада бемор тана ҳарорати кўтарилганини ўз вақтида аниқламаган. Йўл қўйган бир неча хатолари сабаб бемор иситмаси кўтарилиб, юраги биринчи марта соат 16:30 да тўхтаб қолган ва кома ҳолатига тушган. Беморда иккинчи марта соат 17:10 да, учинчи марта соат 17:53 да юрак фаолияти тўхташи юзага келган.
Фарҳод Маннопов чуқур коматоз ҳолатга тушиб қолгани оқибатида ўзига келмасдан, ўткир юрак қон-томир, нафас, буйрак ва жигар етишмовчилиги, DVС синдроми, ўпка ва мия шиши (полиорган етишмовчилик) билан 2023 йил 5 март куни соат 03:20 да клиниканинг ўзида вафот этган. Марҳум 27 ёшда бўлган.
Маълумот учун, Жиноят иши 2023 йил сентябрь ойида судга оширилган эди. 2023 йил октябрида марҳумнинг яқинлари илтимоси билан суд жараённинг ОАВда ёритилишини тақиқлаган.
Изоҳ (0)