Ўзбекистон президенти Шавкат Мирзиёев 30 июль — Халқлар дўстлиги куни муносабати билан аҳолига табрик йўллади.
Давлат раҳбари ўз табригида мамлакатда 130 дан ортиқ миллат ва элат вакиллари якдил ва тинч ҳаёт кечираётганини таъкидлаган. Ўзаро ҳурмат ва ҳамжиҳатлик муҳити Ўзбекистоннинг энг муҳим бойликларидан бири экани қайд этилган.
Табрикда таъкидланишича, сўнгги йилларда миллатлараро муносабатлар соҳасида ҳуқуқий ва институционал асослар мустаҳкамланган, давлат ва жамоат ташкилотлари ўртасида самарали ҳамкорлик шаклланган. Мамлакатдаги 157 та миллий-маданий марказ, 42 та дўстлик жамияти ва хориждаги 100 дан зиёд ватандошлар бирлашмалари бу жараёнда фаол иштирок этмоқда.
Президент турли миллат вакилларининг давлат ва жамият ҳаётидаги ўрнини эътироф этиб, уларнинг ижтимоий-иқтисодий соҳалардаги ҳиссасини олқишлаган.
“Уларнинг орасида депутат ва сенаторлар, таниқли ишлаб чиқариш вакиллари, тадбиркорлар, таълим, тиббиёт, илм-фан, маданият, адабиёт, санъат ва спорт намояндалари борлигини барчамиз яхши биламиз”, дейилади табрик матнида.
Шу билан бирга, президент Марказий Осиё мамлакатлари билан муносабатлар янги босқичга кўтарилганини таъкидлаган. Бунга мисол сифатида Ўзбекистон – Қирғизистон – Тожикистон чегаралари ўзаро туташган нуқтада “Дўстлик” стелласи ўрнатилгани келтирилган. Мазкур стелла яхши қўшничилик ва стратегик шериклик муносабатлари мустаҳкамланиб бораётганидан далолат экани қайд этилган.
Табрик сўнгида давлат раҳбари барча фуқароларни Ўзбекистонда тинчлик ва барқарорликни сақлаш, ёш авлодни билимли ва бағрикенг қилиб тарбиялашга чақирган ҳамда барчага соғлик, муваффақият ва фаровонлик тилаган.
Изоҳ (0)