Миср фуқаро авиацияси вазири Хоссам Камолнинг маълум қилишича, Синай яриморолида қулаган A321 лайнери экипажи фалокат (SOS) сигналини йўлламаган. Бу ҳақда «Коммерсант» хабар бермоқда.
Вазирнинг сўзларига кўра, самолёт бортидан ҳеч қандай сигнал келиб тушмаган. «Фожиага қадар самолёт бортидаги муаммолар ҳақида бизга ҳеч қандай хабар берилмади. Шунингдек, биз ҳеч қандай SOS сигналини ҳам олмадик», — деди Камол.
Аввалроқ Миср авиация маъмурияти Россия самолёти авиаҳалокат арафасида лайнерни Синай шимолидаги Эл-Аришга фавқулодда қўндиришга уринмоқчи бўлгани ҳақида маълум қилганди. Миср авиация ҳодисаларини тергов қилиш қўмитаси вакилининг сўзларига кўра, учувчи ердаги диспетчерларни самолётда «техник муаммо» пайдо бўлгани ва у имкон қадар тезроқ қўниши кераклиги ҳақида огоҳлантирган.
Эслатиб ўтамиз, 31 октябрь, шанба куни Мисрда Metrojet («Когалимавиа») авиакомпаниясининг Шарм-аш-Шайхдан Санкт-Петербургга учаётган Airbus A321 лайнери ҳалокатга учради. Самолёт бортида бўлган 224 кишининг барчаси ҳалок бўлди. Авиаҳалокатга техник носозликлар сабаб бўлган бўлиши мумкин.
Изоҳ (0)