Turkish Airlines авиакомпаниясининг Истанбулдан Анталияга учаётган самолёти учиш-қўниш йўлагида тутай бошлади. Йўловчилар зудлик билан эвакуация қилинди. Бу ҳақда Milliyet хабар берди.
Ижтимоий тармоқларда аэропортдаги вазиятни акс эттирувчи видеолар тарқалди. Boeing 777 самолёти Анталия аэропортига қўнгандан сўнг шассисидан тутун чиқишни бошлаган. Авиакомпания йўловчилар хавф остида қолмагани, бироқ эҳтиёт чораси сифатида самолётдан эвакуация қилинганини айтди.
Йўловчиларимиз ўз вақтида хавфсиз жойга кўчирилди, жабрланганлар йўқ. Ваколатли мутахассислар ҳаво кемасини техник кўрикдан ўтказишни бошлади. Дастлабки текширувлар натижасида тутун чиқишига гидравлик қувурнинг техник носозлиги сабаб бўлгани аниқланди, дейилади Turkish Airlines матбуот хизмати баёнотида.
Жами рейснинг 247 нафар йўловчиси ва 13 нафар экипаж аъзоси эвакуация қилинган. Туркия Транспорт вазирлиги ҳодисани ўрганиш ва баҳолашни бошлаган.
20 июль куни АҚШнинг Лос Анжелес халқаро аэропортидан ҳавога кўтарилган Boeing 767-400 самолётининг двигатели ёниб кетганди. Самолётда тўққиз нафар экипаж аъзоси ва 226 нафар йўловчи бўлган.
Улар Атлантага йўл олган, бироқ парвоз вақти учоқнинг чап двигателида муаммо юзага келган. Натижада учувчи самолётни ортга қайтаришга мажбур бўлган. Барча йўловчилар самолёт бортидан эсон-омон эвакуация қилинган эди.
Изоҳ (0)