Баъзан фильмнинг якуний монтажидан сўнг персонажлар йўқолиб қолади. Бу одатда продюсер ёки режиссёрларнинг қарори бўлиб, улар фильмнинг суръатини сақлаш, давомийлигини қисқартириш ёки драматик таъсирни кучайтириш мақсадида шундай йўл тутади. Ҳатто таниқли актёрлар иштирок этган саҳналар ҳам ортиқча бўлиб қолиши мумкин.
Анна де Армас
“Кеча” фильмида актриса иштирок этган кадрларнинг олиб ташланишига сабаб жуда оддий: картинанинг дастлабки версиясини кўрган синов гуруҳи унинг қаҳрамони ва Жек Малик ўртасидаги романтик муносабатларга салбий муносабат билдирган. Томошабинлар Жекнинг севгилисига содиқ қолишини маъқул кўришган.
“Кеча” комедияси мусиқачи Жек Малик ҳақида ҳикоя қилади. У Битлз гуруҳини эслайдиган ягона одам ўзи бўлган дунёда уйғонади. Уларнинг қўшиқлари туфайли Жек муваффақиятга эришади, аммо Лили Жеймс ижро этган қиз билан муносабатларида муаммолар юзага келади.
Фильм сценарийси муаллифи Ричард Кертис Анна иштирокидаги саҳналарни кесиб ташлашга мажбур бўлганидан афсусланган, чунки у ўз ролини ажойиб тарзда ижро этганди. Шунга қарамай, Universal Pictures киностудияси Де Армасни фильм трейлерига киритади, бу эса у муҳим рол ўйнаётгандек таассурот уйғотган. Шу сабабли актрисанинг бир нечта мухлислари компанияни судга беради: улар ўзларини алданган деб ҳисоблашди. Бироқ суд жараёнида ютиб чиқишмаган.
Тим Рот
Актёр Квентин Тарантинонинг тўртта фильмида: “Қутурган итлар”, “Жиноий асар”, “Тўрт хона” ва “Жирканч саккизлик”да рол ўйнаган, бироқ эътиборли томошабин унинг исмини бешинчи фильмда ҳам кўриши мумкин. Тим Рот “Бир пайтлар Голливудда” фильмининг якуний титрларида Леонардо Ди Каприо ва Бред Питтдан кейин кўрсатилади, аммо уни экранда кўрмайсиз, чунки Рот билан боғлиқ барча саҳналар кесиб ташланган.
Тим Рот Жей Себрингнинг хизматкорини ижро этиши керак эди, лекин британиялик актёр иштирок этган кадрларни олиб ташлашга тўғри келди. Бунинг сабаби фильм ҳаддан ташқари чўзилиб кетган: дастлаб у тўрт соат давом этган ва унинг иштирокидаги саҳналар воқеалар ривожига ҳеч қандай таъсир кўрсатмаганди. Тарантино 2019 йилда фильм экранларга чиққандан сўнг, интервьюда Рот “жамоанинг бир қисми” бўлишига қарамай, унинг қаҳрамони тасвирланган кадрлар фақатгина “қизиқарли кичик эпизод” бўлиб, якуний вариантга мос келмаслигини айтган.
Пол Радд
Дастлаб Пол Фигнинг “Вегасдаги базм” комедиясида актёр ёмон феъл-атворли эркак ролини ижро этиши мўлжалланганди. Полнинг қаҳрамони Кристен Уиг қаҳрамони билан учрашувга чиқади. Сюжетга кўра, уларнинг учрашуви муз майдончасида бўлади, улар конкида учаётганда Радднинг қаҳрамони ножўя ҳаракатлар қилади. Аммо монтажда бу саҳнани олиб ташлашга қарор қилишади: продюсерлар Эннининг Жон Хемм ва Крис OʼДоуд қаҳрамонлари билан бўлган севги учбурчагини ҳисобга олган ҳолда, бу саҳнани ортиқча романтик йўналиш деб ҳисоблашади.
Ҳаррисон Форд
Актёр “Ўзга сайёралик” фильмида бош қаҳрамон Эллиот исмли бола таълим оладиган мактаб директори ролини ўйнаганди, бироқ Ҳаррисон Форд иштирокидаги саҳна киноҳитнинг якуний талқинидан чиқариб ташланади. Фильм режиссёри Стивен Спилберг Форднинг бундай кичик ролда қатнашиши актёрнинг тобора ошиб бораётган машҳурлигини ҳисобга олиб, томошабинлар эътиборини чалғитиши мумкин, деб ҳисоблайди. Бундан ташқари, фильмда бола дунёқарашига урғу камайиб кетиши мумкин эди.
Изоҳ (0)