«Ўзавтосаноат» Тольятти шаҳрида ўтказилган «Автомобиль бутловчи қисмлари» кўргазмасида иштирок этди

Россиянинг Тольятти шаҳрида «Автосаноат. Автомобиль бутловчи қисмлари» ихтисослаштирилган халқаро кўргазма-форуми ўтказилди, деб хабар беради «Ўзавтосаноат» АК матбуот хизмати.

Автомобиль саноатидаги йилнинг энг асосий воқеаси сифатида эътироф этилган мазкур кўргазма ўз майдонларида Россия, Франция, Испания, Словения ва МДҲ давлатларидан 600 нафардан ортиқ мутахассис ва раҳбарларни жамлади. Мазкур кўргазмада, шунингдек, «Ўзавтосаноат» АК делегацияси ҳам иштирок этди.

UzAuto махсус стендларида Ўзбекистондаги ишлаб чиқариш корхоналарида тайёрланаётган маҳсулотларнинг экспортга йўналтирилган турлари намойиш этилди. Автомобиль ойналари, сиғими 1,5 л бўлган BDOHC двигателларининг янги авлоди, двигателларни совутиш ва шамоллатиш тизимлари, пўлат дисклар, компрессорлар, генераторлар, ёритиш тизимлари ва бошқалар мана шулар жумласидандир.

Кўргазмага ташриф буюрганлар UzAuto учун ажратилган махсус стендларда намойиш этилган маҳсулотларга юқори баҳо берди ва ҳамкорлик қилиш учун қизиқиш билдирди.

Эслатиб ўтамиз, «Ўзавтосаноат» АК вакиллари сентябрь ойида Чехиядаги MSV 2015 халқаро автомобилсозлик кўргазмасида иштирок этди.