Пентагон Туркиянинг Газиантеп вилоятидан «Пэтриот» зенит ракета тизимларини олиб чиқишни бошлади. Бу ҳақда Туркия матбуотига асосланиб, «Интерфакс» хабар бермоқда.
Ҳозирги вақтда жанговар машиналар Туркиянинг Ўртаер денгизи соҳилларидаги Искендерун портига йўл олган, у ердан мазкур қурол-аслаҳалар Америка ҳарбий кемаларига ортилади.
16 август куни АҚШ томони 2015 йилнинг октябрь ойида Туркиядан «Пэтриот» тизимлари олиб чиқилишини маълум қилганди. Пентагон вакили Жефф Дэвиснинг маълум қилишича, мазкур қарор қўшни Суриянинг ҳарбий салоҳияти сустлашгани муносабати билан қабул қилинган.
«Биз Башар Асад тузуми кучсизланаётганини кўрмоқдамиз, Сурия ракета захираларининг катта қисми Сурия ҳудудидаги нишонларга қарата йўлланаётганига гувоҳ бўляпмиз», — деганди Дэвис.
Маълумот учун, НАТОга аъзо мамлакатлар — АҚШ, Германия ва Голландиянинг иккитадан «Пэтриот» зенит ракета тизимлари батареялари 2013 йили Туркиянинг Сурия билан чегарадош ҳудудларига ўрнатилган эди.
Изоҳ (0)