Сингапурнинг биринчи бош вазири Ли Куан Ю ўлимидан аввал эвтаназияни амалга оширмоқчи бўлган, дея хабар бермоқда The South China Morning Post.
Сиёсатчининг қизи Ли Вей Линг сўзларига кўра, отаси сўнгги йилларда қийналиб яшаган. У эвтаназия масаласида шифокорлар билан гаплашган, бироқ Сингапурда бу тақиқлангани учун улар бу ҳақда ўйлаб кўришдан ҳам бош тортган. Шунда собиқ бош вазир қизига мурожаат қилиб, уни хорижга олиб кетишини сўраган, бироқ Ли Вей Линг буни ноқонуний деб ҳисоблагани учун отасининг илтимосини рад этган.
Эслатиб ўтамиз, мустақил Сингапурнинг биринчи бош вазири Ли Куан Ю 22 март куни узоқ давом этган касалликдан сўнг 91 ёшида вафот этди.
Сингапур давлатининг асосчиси бешинчи февраль куни ўткир зотилжам касаллиги билан шифохонага ётқизилган эди. Бош вазир матбуот хизмати 18 март куни Ли Куан Юнинг аҳволи ёмонлашгани ҳақида баёнот берди.
Маълумот учун, Ли Куан Ю Сингапур ҳукумати тепасига 1959 йилда келган бўлиб, давлатни 1990 йилгача узлуксиз бошқарган. Айнан унинг даврида Сингапур қашшоқ давлатлар қаторидан чиқиб, дунёнинг молиявий марказларидан бирига айланган, аҳоли турмуш даражаси бўйича эса юқори учликдан жой олган.
Изоҳ (0)