Миллиардер Уоррен Баффетнинг Berkshire Hathaway инвест-холдинги 32 миллиард доллар эвазига аэрокосмик ва мудофаа саноати учун металл конструкциялар ишлаб чиқарувчи Precision Castparts корпорациясини сотиб олади. «РБК»нинг ёзишича, бу Баффет компанияси тарихидаги энг катта харид бўлади.
The Wall Street Journal’нинг қайд этишича, Berkshire Hathaway холдинги Precision Castparts акцияларининг ҳар бирини 235 доллардан, яъни, 7 август, жума кунги савдолар ёпилиши вақтидаги нархдан (ҳар бир акция учун 193,88 доллар) 21 фоизга кўпроқ мукофот пули билан бирга сотиб олади. Қарзларни ҳам қўшиб ҳисоблаганда, Precision Castparts Баффет учун 37,2 миллиард долларга тушади.
Berkshire Hathaway ҳозирнинг ўзида Precision Castparts’нинг 3 фоизига эгалик қилмоқда. Савдо 2016 йилнинг биринчи чорагида якунига етиши кутилмоқда. Корпорация ўз номини сақлаб қолади.
Berkshire Hathaway холдинги бозор қиймати 363 миллиард долларга тенг бўлиб, мазкур кўрсаткич бўйича у жаҳонда тўртинчи ўринда туради. Компания суғурта бизнеси, темирйўл транспорти, коммунал корхоналар, саноат ишлаб чиқариши, уй-жой қурилиши, озиқ-овқат маҳсулотларини ишлаб чиқариш ва автомобиль савдосига инвестиция киритади.
Precision Castparts авиасозлик саноати, электростанциялар ва нефть-газ соҳаси учун бутловчи қисмлар, қувурлар ишлаб чиқаради. Компания бош қароргоҳи Орегон штатининг Портленд шаҳрида жойлашган.
Изоҳ (0)