Шимолий Кореяда 19 июль куни бўлиб ўтган маҳаллий сайловларда сайловчиларнинг 99,97 фоизи иштирок этди. Бу ҳақда, КХДР Марказий сайлов комиссиясига асосланиб, The Guardian нашри хабар бермоқда.
Нашрнинг қайд этишича, сайловда КХДРнинг хорижда бўлган фуқароларигина қатнашмаган, холос. Қариялар ва саломатлиги сайлов участкасига бориш имконини бермайдиган шахслар олдига кўчма сайлов урналари олиб борилган.
Корея марказий телеграф агентлиги хабарига кўра, «сайловнинг барча қатнашчилари ноодатий иштиёқ билан овоз берган». Ўз фуқаролик бурчини бажарганлар орасида, жумладан, КХДР етакчиси Ким Чен Ин ҳам бор.
КХДРдаги сайловчиларга таклиф қилинадиган рўйхатларда фақат бир кишининг исми бўлади. Номзод ҳукмрон Корея Меҳнат партияси томонидан олдиндан тасдиқланади. КМПга Ким Чен Ин етакчилик қилади.
Шунингдек, мамлакатда яна иккита, амалда КМП назорати остидаги майда сиёсий ташкилотлар бор. Булар — Осмон йўлининг ёш дўстлари партияси ҳамда Корея социал-демократлар партияси.
Шимолий Кореядаги сайловларда сайловчиларнинг иштирокига доир рақамлар ҳар доим юқори бўлган. Хусусан, 2014 йилги парламент сайловларида ҳам сайловчиларнинг 99,97 фоизи иштирок этганди.
КХДРда маҳаллий қонунчилик органлари аъзолари 4 йил муддатга сайланади. Мазкур давр мобайнида улар турли масалаларни муҳокама қилиш, хусусан, маҳаллий бюджетни тасдиқлаш учун йилига бир ёки икки марта йиғилади.
Изоҳ (0)