Рамазон рўзасининг қачон бошланиши ва тугаши ҳақида батафсил изоҳ берилди

Ўзбекистон Мусулмонлари идораси қачон рамазон рўзасининг бошланиши ва тугаши ҳақида батафсил маълумот берди.

«Рамазон рўзасининг бошланишини аниқлаш рамазондан бир ой олдин бошланади. Чунки олдин шаъбон ойининг биринчи куни аниқланиши лозим. Шаъбоннинг йигирма тўққизинчи куни шомдан олдин рамазон ҳилолини кўришга чиқиш вожиб бўлади. Агар шу куни ҳилолни ҳамма кўрса, эртаси куни рамазон рўзаси тутилади.

Рамазон ҳилолини ҳамма кўриши жуда кам бўладиган ҳолат. Ҳаво булутли ё чанг бўлганидан ҳеч ким рамазон ҳилолини кўрмаса, муфтий шаъбонни ўттиз кунга тўлдирилишини ва кейинги кун рамазон рўзаси бошланишини эълон қилади. Яъни, бу ҳолда рамазон рўзаси бошланишини фақат муфтий эълон қилади», — деб ёзилади Мусулмонлар идораси сайтида.

«Ҳаво булутли ё чанг бўлганида бир киши, шаввол ҳилолини кўрдим деб, эртанги куни оғзини очмаслиги лозим. Агар оғзини очса, бир кун қазо тутиб бериши вожиб бўлади. Агар бир қанча кишилар фалон юртда бугун рўзанинг ўттизинчи куни, эртага ҳайит, улар биздан бир кун олдин ойни кўриб, рўза тутишган экан, десалар, эртанги куни оғиз очилмайди, таровеҳ намози ҳам қолдирилмайди. Чунки улар, ўзлари ё бошқаларнинг шаввол ойи ҳилолини кўришгани ҳақида гувоҳлик бермаган», — дейилади muslim.uz сайтида.

Мақолада Шайх Юсуф Қаразовийнинг бу борадаги сўзларидан парча келтирилади:

«Бир юрт ёки бир шаҳар фуқароларининг бир-биридан ажралиб, бир гуруҳи бугун рамазон деб рўза тутиши, бошқаси уни шаъбондан деб тутмаслиги, ой охирида эса, бир гуруҳи рўза тутиб, бир гуруҳи ҳайит қилиши қабул қилинмайдиган бир ҳолат.

Уламоларнинг бу масаладаги иттифоқи шуки, ҳокимнинг ҳукми ёки бошлиқнинг қарори ихтилофли масалаларда ихтилофни тўхтатади. Агар бир мусулмон юртда янги ой чиқишини аниқлашга масъул идора: олий маҳкама ёки фатво ҳайъати ёки диний ишлар бошқармаси ёки бошқаси рўза тутиш ёки рўзани очиш бўйича қарор чиқарса, ўша юрт мусулмонлари бунга итоат қилишлари, бўйсунишлари керак. Чунки бу яхшилик йўлидаги итоатдир. Гарчи бу бошқа юртда тасдиқланган ишга хилоф бўлса ҳам. Чунки бу ҳукм ‘Ҳар бир юрт аҳли ўзлари янги ойни кўрадилар’, деган қарашга асосланган бўлади».