Бразилияда 10 мингдан зиёд балиқ дунёдаги энг йирик чучук сувли аквариумга кўчирилишни кутиш чоғида ҳалок бўлди. Ҳодиса Мату-Гросу-ду-Сул штатининг Кампу-Гранди шаҳрида рўй берди, дея хабар бермоқда Channel News Asia.
Улкан аквариум 2014 йил охирида ишга тушиши режалаштирилгани сабабли ноябрда Африка, Осиё ва Океаниядан балиқлар келтирилганди. Аммо қурилиш чўзилгани учун балиқлар вақтинчалик аквариумларга жойлаштирилган ва уларнинг қаровига 5,2 миллион реал ажратилган. Бироқ сув жониворларининг 80 фоизи ҳарорат ўзгаришини кўтара олмади, 10 фоизи касаллик туфайли нобуд бўлди, яна шунчаси кўчишга дош бермади.
Ҳодиса билан штат прокуратураси шуғулланмоқда. Улкан аквариумнинг ишга тушиши эса номаълум муддатга қолдирилди.
Изоҳ (0)