Ўзбекистон автомобиль ва дарё транспорти агентлигида «Мамлакатимизда йўналишсиз такси қатновларини тартибга солиш борасидаги устувор вазифалар, амалиёт ва тажрибалар» мавзусидаги матбуот анжумани ўтказилди. Бу ҳақда ташкилот ахборот хизмати хабар бермоқда.
Матбуот анжуманини Агентликнинг Ахборот хизмати раҳбари Н. Асриддинов мавзулар ҳақида тайёрланган маълумотлари билан бошлаб берди. Сўнгра лицензиялаш, ҳаракат хавфсизлигини ташкил этиш ва назорат қилиш бўлими бошлиғи А. Исаев Республикада автомобиль транспортига кўрсатилаётган хизматлар, Агентлик томонидан автотранспорт соҳасида меъёрий-ҳуқуқий ҳужжатлар, лицензия олиш қонун-қоидаси ва тартиби, Мустақиллик йилларида автотранспорт соҳасида амалга оширилаётган ислоҳотлар ва уларга риоя этилишини назорат қилиш борасида бажарилаётган ишлар тўғрисида журналистларга батафсил маълумот берди.
«2014 йилнинг ўзида қўшимча равишда 64 та, жорий йилнинг ўтган даврида 33 та йўловчилар ташиш йўналишлари очилди. Энг эътиборлиси, уларнинг асосий қисми қишлоқ фуқароларига хизмат қиладиган йўналишлардир. Натижада бугунги кунда бирон бир чекка қишлоқ йўқки автомобиль йўналишлари ўтмаган бўлсин. Соҳада эътиборга молик яна бир факт бор. Яъни, бугунги кунда автотранспорт хизматларининг 99 фоизи хусусий сектор томонидан амалга оширилмоқда», – деди маърузачи.
Хусусий тадбиркорлар учун соҳада эркин фаолият юритишларини кафолатловчи меъёрий-ҳуқуқий ҳужжатлар ва зарур шарт-шароитлар яратилгани сабабли тадбиркорлар соҳага тобора кўпроқ сармоя тикмоқдалар. Яъни, ташувчилар ўз маблағлари ҳисобидан замонавий Isuzu автобуслари, Nexia, Lacetti, Cobalt русумли енгил автомобилларни харид қилиб, йўловчилар хизматига чиқармоқда.
Анжуманда таъкидланишича, ташувчилар томонидан 2014 йилда фақатгина Самарқанд автомобиль заводида ишлаб чиқарилган Isuzu русумли автобуслардан 427 таси сотиб олиниб, шаҳар ва шаҳар атрофи йўналишларида хизмат кўрсатилиши йўлга қўйилди. Натижада қўшимча 790 та янги иш ўринлари яратилди. Жорий йилда ҳам ушбу автобуслардан 641 донасини олиш режалаштирилган.
Изоҳ (0)