25 июнь куни «Электрон ҳукумат» тизимини ривожлантириш маркази томонидан Алоқа тарихи музейида Грузия Республикаси Адлия вазирлигининг ахборот алмашинуви агентлиги лойиҳалари бошқарувчиси Паата Сирбиладзе билан давра суҳбати ўтказилди. Бу ҳақда Марказ матбуот хизмати хабар бермоқда.
Паата Сирбиладзе давра суҳбати иштирокчиларига Грузия электрон ҳукумат тизимини ривожланиш босқичлари, бугунги кундаги аҳволи, уни такомиллаштиришга доир олиб борилаётган ислоҳатлар хусусида сўзлаб берди.
Грузия давлатининг вакили ўз маърузасида «Ягона дарча» марказлари фаолиятини ташкиллаштириш масалаларига тўхтаб ўтар экан, электрон ҳукумат тизимида «фронт-оффис», «бэк-оффис»ларни ташкил этиш, шунингдек, давлат органларида маълумотларни алмашиш жараёни масалаларига алоҳида тўхтаб ўтди. Бундан 10 йил аввал ҳужжатларни расмийлаштиришга 10 кун вақт кетган бўлса, ҳозир ушбу давлатда бу жараён 2 соатгина вақтни олади. Электрон хизматни оммалаштириш ишлари мактаб давриданоқ бошланади. Грузияда 2300 та мактаб компьютерлаштирилган, интернет тармоғига уланган. Ўқувчилар 14—15 ёшиданоқ қандай давлат хизматлари электрон усулда кўрсатилишини билади. Мактабни битириш имтиҳонлари электрон шаклда олинади. Битирув тестларини топшира олмаган битирувчига мактабни битирганлиги тўғрисида гувоҳнома берилмайди, бу эса уни Олий ўқув юртига кириш имконидан маҳрум этиш демакдир. Олий ўқув юртига кириш жараёнидаги тестлар Францияда чоп этилади. Онлайн-имтиҳонларни топширишни йўлга қўйиш орқали Грузия ўқишга киришдаги порахўрликка чек қўйди.
Паата Сирбиладзенинг таъкидлашича, 2016 йилда БМТ томонидан эълон қилинадиган рейтинг кўрсаткичида Грузия 50 талик ўриндан бирини эгалламоқчи. 2012 йилда БМТ томонидан ўтказилган текширувлар натижасида Грузия электрон хизматларни тўғри йўлга қўйганлиги сабабли «Давлат хизматларида коррупсиянинг олдини олиш ҳамда унга қарши курашиш» борасида 2-ўринни эгаллаган. Грузиянинг электрон ҳукумат тизими борасидаги мувафаққиятлари Европа қурилиши ва тараққиёти банки, Transparency International маркази, Европа парламенти томонидан алоҳида таъкидлаб ўтилмоқда. Хориждаги Грузия фуқароси давлат хизматлари портали орқали ўзининг давлат элчихонасига ташриф буюрмаган ҳолда янги паспорт олиши ёки уни алмаштириши, бу жараёнда банк картасидан тўловни амалга ошириши мумкин. Бу каби хизматларга Грузия давлати фуқаролигини олиш хизматини ҳам мисол қилиб келтирса бўлади.
«Грузия ўзининг электрон ҳукумат тизимини ривожлантириш жараёнида Австрия, Буюк Британия, Дания каби мамлакатларнинг тажрибасини ўрганган ҳолда, ўзининг географик шароитини ҳисобга олди. Тоғли ҳудудларимизда интернет тезлиги ниҳоятда паст бўлади. Электрон ҳукумат тизимимизни такомиллаштиришда ушбу омилларга мос тарзда ўз иш режамизни туздик. Режани амалга ошириш жараёнида ушбу тизимни янада ўрганиш жараёнидамиз. Зеро, бир кун ўрганмаслик тараққиёт жараёнини тўхташига олиб келади», — деб давра суҳбатига якун ясади Паата Сирбиладзе.
Изоҳ (0)