O‘zbekiston avtomobil va daryo transporti agentligida “Mamlakatimizda yo‘nalishsiz taksi qatnovlarini tartibga solish borasidagi ustuvor vazifalar, amaliyot va tajribalar” mavzusidagi matbuot anjumani o‘tkazildi. Bu haqda tashkilot axborot xizmati xabar bermoqda.
Matbuot anjumanini Agentlikning Axborot xizmati rahbari N. Asriddinov mavzular haqida tayyorlangan ma’lumotlari bilan boshlab berdi. So‘ngra litsenziyalash, harakat xavfsizligini tashkil etish va nazorat qilish bo‘limi boshlig‘i A. Isayev Respublikada avtomobil transportiga ko‘rsatilayotgan xizmatlar, Agentlik tomonidan avtotransport sohasida me’yoriy-huquqiy hujjatlar, litsenziya olish qonun-qoidasi va tartibi, Mustaqillik yillarida avtotransport sohasida amalga oshirilayotgan islohotlar va ularga rioya etilishini nazorat qilish borasida bajarilayotgan ishlar to‘g‘risida jurnalistlarga batafsil ma’lumot berdi.
“2014-yilning o‘zida qo‘shimcha ravishda 64 ta, joriy yilning o‘tgan davrida 33 ta yo‘lovchilar tashish yo‘nalishlari ochildi. Eng e’tiborlisi, ularning asosiy qismi qishloq fuqarolariga xizmat qiladigan yo‘nalishlardir. Natijada bugungi kunda biron bir chekka qishloq yo‘qki avtomobil yo‘nalishlari o‘tmagan bo‘lsin. Sohada e’tiborga molik yana bir fakt bor. Ya’ni, bugungi kunda avtotransport xizmatlarining 99 foizi xususiy sektor tomonidan amalga oshirilmoqda”, – dedi ma’ruzachi.
Xususiy tadbirkorlar uchun sohada erkin faoliyat yuritishlarini kafolatlovchi me’yoriy-huquqiy hujjatlar va zarur shart-sharoitlar yaratilgani sababli tadbirkorlar sohaga tobora ko‘proq sarmoya tikmoqdalar. Ya’ni, tashuvchilar o‘z mablag‘lari hisobidan zamonaviy Isuzu avtobuslari, Nexia, Lacetti, Cobalt rusumli yengil avtomobillarni xarid qilib, yo‘lovchilar xizmatiga chiqarmoqda.
Anjumanda ta’kidlanishicha, tashuvchilar tomonidan 2014-yilda faqatgina Samarqand avtomobil zavodida ishlab chiqarilgan Isuzu rusumli avtobuslardan 427 tasi sotib olinib, shahar va shahar atrofi yo‘nalishlarida xizmat ko‘rsatilishi yo‘lga qo‘yildi. Natijada qo‘shimcha 790 ta yangi ish o‘rinlari yaratildi. Joriy yilda ham ushbu avtobuslardan 641 donasini olish rejalashtirilgan.
Izoh (0)