Американинг Aira стартапи кўзи ожиз ёки яхши кўрмайдиган одамларга махсус ўқитилган ассистентларнинг аудиокўрсатмалари ёрдамида шаҳар бўйлаб ҳаракатланиш имконини берадиган сервисни ишлаб чиқди. Компания сайтида ёзилишича, сервисдан фойдаланиш учун Google Glass кўзойнаклари керак бўлади.
Сервис ҳозирда бета-синов ҳолатида бўлиб, 2016 йилнинг биринчи чорагида оммавий фойдаланиш учун чиқарилади. Aira’дан фойдаланиш учун Google Glass кўзойнакларини сотиб олиш шарт эмас, улар ойлик обуна доирасида фойдаланувчига тақдим этилади.
Фойдаланувчи кўзойнакни тақиб, сервисни ишга туширганидан сўнг, ассистент видео орқали, шунингдек, бошқа технологиялар ёрдамида унинг қаерда тургани, бу ҳудуддаги йўл қатнови ҳолати, яқин орада фойдаланувчига маъқул келиши мумкин бўлган жойлар рўйхатини олади.
Тизим фойдаланувчи ҳақидаги ҳар бир маълумотни – унинг касаллик тарихи, фавқулодда вазиятларда ишонган одамлари алоқа маълумотлари, шунингдек, маъқул кўрган нарсалари – қаҳвахоналар, энг кўп борадиган жойлари, хобби ва одатлари ҳақидаги маълумотларни батафсил тўплаб боради.
Кўзи ожиз ёки яхши кўрмайдиган фойдаланувчига яқин қариндоши, бирор кўнгилли ёки Aira’нинг ходими ассистентлик қилиши мумкин. Уларни ўқитиб, фаолиятга тайёрлаш мажбуриятини Aira ўзига олади. Шартнома шартларига кўра, ассистент фойдаланувчи танийдиган ва ишонган киши бўлиши керак.
Ушбу сервисдан фақат Google Glass’да фойдаланиш мумкинми ёки HoloLens, Oculus Rift, Mini Augmented Vision каби бошқа муқобил технологияларда ҳам ундан фойдаланса бўладими – ҳозирча буниси аниқ эмас.
Изоҳ (0)