Қозоғистоннинг Чимкент шаҳрида уч нафар ишчи чиқинди ташишда давлат байроғидан фойдаланди, дея хабар бермоқда «Nur.kz».
Ушбу воқеани гувоҳлар камерага муҳрлади. Расмларда уч киши контейнердаги ахлатни байроқ ичига солаётгани акс этган (уни чиқинди ташувчи машинага олиб боришни режалаштирган бўлса керак).
Бу айнан қаерда содир бўлгани, қайси компания ишчилари чиқиндини шу тариқа ташиётганини айни пайтда Чимкент ИИББ ходимлари аниқламоқда.
Бошқарма бошлиғи Дархон Мейрхон сўзларига кўра, айбдорлар Қозоғистон Жиноят кодексининг 372-моддаси («Давлат рамзларига беҳурматлик кўрсатиш») бўйича жавобгарликка тортилади. Улар ойлик ҳисоб кўрсаткичининг 2 минг баробаригача бўлган жарима ёки ахлоқ тузатиш ишлари, ёки 2 йилгача қамоқ жазосига маҳкум этилиши мумкин.
Айни пайтда бригада аъзолари шахси аниқланмоқда.
Изоҳ (0)