Агар Туркия президенти Ражаб Тойиб Эрдўған конституцияда белгилаб қўйилган ваколатлари чегарасида ҳаракат қиладиган бўлса, курдларнинг Халқ демократик партияси (ХДП) бошқа партиялар, жумладан, ҳукмрон Адолат ва тараққиёт партияси (АТП) билан биргаликда коалицион ҳукуматни шакллантиришда иштирок этишга тайёр. Бу ҳақда Korrespondent.net хабар бермоқда.
ХДП якшанба куни бўлиб ўтган Туркия парламенти сайловларида муваффақиятли иштирок этиб, сайловчиларнинг 13 фоиз овозини қўлга киритиб, 80та депутатлик ўрнига эга чиқди.
Туркия бош вазир Аҳмет Давутўғлунинг сўзларига кўра, у раҳбарлик қилаётган АТП коалицион вазирлар маҳкамасини ташкил этишга тайёр, бироқ, унинг фикрича, коалиция Туркия учун мақбул сиёсий модель эмас.
Давутўғлунинг қайд этишича, 1970-1980 йиллардаги коалициялар бу модель Туркия учун ўзининг мақбул эмаслигини намойиш этиб бўлган.
Шунга қарамай, 40 фоиз овозни қўлга киритиб, парламентдаги 258 ўринга эга чиққан АТП коалиция учун ҳамкор излашга мажбур, чунки мутлақ кўпчилик ўрнини бой берди.
Сайлов натижаларига кўра, сўллар ва миллатчилар мос равишда 25 фоиз (132 депутатлик ўрни) ва 16 фоиз (80 депутатлик ўрни)ни қўлга киритди.
Изоҳ (0)