Ўзбекистон Миллий кутубхонаси «Истиқбол» залида болалар китоблари кўргазмаси очилди. Унда фойдаланувчилар эътиборига янги нашрлар ҳавола этилган, деб хабар беради Алишер Навоий номидаги Ўзбекистон Миллий кутубхонаси.
Кўргазма икки қисмдан иборат. Кўргазманинг биринчи қисми «Болалик – беғуборлик тимсоли» деб номланган бўлиб, у бола тарбиясига бевосита алоқадор - тарбиячи, мураббийлар, ўқитувчи, қолаверса, ота-оналар учун мўлжаллаган. Бу ерда намойиш этилган «Фарзанд бурчлари», «Оила маънавияти ва миллий ғурур», «Ўз фарзандингга мадад бўл», «Миллий тарбия асослари», «Права ребёнка», «Фарзанд азиз – она мўътабар» китоблари тарбиявий аҳамиятга эга ҳикоялари ва ўгитлари билан ёш авлод тарбиясида уларга ёрдам беради.
«Болалик олами» деб номланган иккинчи кўргазмада кутубхона фойдаланувчилари эътиборига «Я познаю мир», «Энциклопедия для детей», «Энциклопедия эрудита», «Болалар энциклопедияси», «Большая детская энциклопедия» туркумидан китоблар, ёш билимдонлар учун «Что? Где? Когда?», «Астрономия ва коинот», вақтни қизиқарли ўтказишга кўмаклашувчи «Весёлие конкурси», «1000 заданий для зарядки мозгов» каби китоблар, эртаклар, шеърлар ва ҳикоялар тўпламлари ҳавола этилган.
Энг кичик китобсеварларни эса «Менинг биринчи китобим», «Моя первая книга», «Менинг биринчи энциклопедиям» ва «Кичкинтой кутубхонаси» туркумидан бўлган китоблар бефарқ қолдирмаслиги шубҳасиз.
Кўргазмага ташриф буюрган фойдаланувчилар ўзларини қизиқтирган, бўш вақтларини тўлдира оладиган, янги маълумот оладиган, қизиқарли нарсалар ўрганадиган, ҳозиргача номаълум нарсалардан воқиф этадиган, уларнинг ижодий тасаввурини намоён этадиган китобларни мутолаа қилиш ёки шунчаки китоб варақлаш имконига эга бўлади.
Изоҳ (0)