Ўзбекистон ҳукумати 2 июнь куни бошоқли дон экинларининг янги харид нархларини тасдиқлади. Бу ҳақда Review.uz хабар бермоқда.
Унга кўра, 3 классли юмшоқ буғдойнинг ҳар тоннаси учун 460 минг сўм миқдорида харид нархи белгиланди. 2014 йили бир тонна шундай буғдойнинг қиймати 418 минг сўмга тенг эди.
Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармасига ва «Ўздонмаҳсулот» акциядорлик компаниясига қишлоқ хўжалиги маҳсулотларини ишлаб чиқарувчилар билан ўз вақтида ҳисоб-китоб қилишни таъминлаш ҳақида кўрсатма берилган.
Маълумот учун, Ўзбекистон буғдой етиштириш кўрсаткичларини йилдан йилга оширмоқда. Жумладан, 2011 йили 6,8 миллион тонна ғалла (6,6 миллион тонна буғдой), 2012 йили 7,1 миллион тонна (6,7 миллион тонна буғдой), 2013 йили 7,6 миллион тонна ғалла (6,7 миллион тонна буғдой), 2014 йили эса 8 миллион тоннадан ортиқ ғалла етиштирилган.
Изоҳ (0)