GM Uzbekistan ходимлари Chevrolet Orlando автомобили ва янги Chevrolet Tracker моделини Rally Muynak лойиҳаси доирасида синаб кўради, дея хабар бермоқда «Газета.uz».
«Ўзавтосаноат» компанияси сайтида айтилишича, Ўзбекистонда мамлакат шаҳарлари бўйлаб дастлабки автосаёҳат — Rally Muynak лойиҳаси бошланди. Мазкур лойиҳанинг асосий мақсади — Ўзбекистонда автосаёҳатни оммалаштириш.
«Қадимий шаҳарлар Самарқанд, Бухоро, Хива, Нуротадаги Искандар Зулқарнайннинг «Нур» қалъаси харобалари, Чашма масжид мажмуаси, Қизилқум саҳроси, Ҳайдаркўл сув ҳавзаси каби кўплаб қизиқарли сўлим ва хушманзара жойлар ҳафта давомида автопойга иштирокчиларини қарши олади. Бундан ташқари автосаёҳатчилар йўл-йўлакай қояларга ўйиб ишланган тасвирлар, Аёз-қалъа харобалари билан танишгач, Амударё орқали ўтиб, аксарият сайёҳларнинг орзусига айланган Мўйноқ шаҳридаги Орол фожиаси ҳақида ҳикоя қилувчи саҳродаги кемалар ва ўлкашунослик музейини ҳам кўздан кечириш имконига эга бўлади», — дейилади хабарда.
Дастлабки лойиҳада тўққиз киши тўртта автомобилда иштирок этмоқда. «Ўзавтосаноат» АК вакиллари ҳам автопойгада иштирок этмоқда. GM Uzbekistan АЖ ишчилари бошқа иштирокчилар билан бир қаторда, Ўзбекистоннинг хушманзара жойларига ташриф буюриш билан бирга, Chevrolet Orlando ва янги Chevrolet Tracker русумидаги автомобилларни синовдан ўтказади.
«Яқинда заводимиз янги Chevrolet Tracker русумидаги автомобилига эга бўлди. Мазкур автопойгада эса ушбу янги автомобилни синовдан ўтказишни режалаштирганмиз. Бизнинг вазифамиз, барчага таниш Chevrolet Orlando ва янги Chevrolet Tracker автомобиллари юртимиз иқлимига қанчалик мос келиши ва ноқулай йўл шароитида қандай ҳаракатланиши ҳақида автоҳаваскорлар ва ҳайдовчилар томонидан бериладиган саволларга холис жавоб бериш. Бизнинг вазифамиз — автосаёҳат давомида юқори ҳароратда, қум ва чанг йўлларда автомобилнинг узоқ масофага қандай ҳаракатланишини кузатиш. Ёнилғи сарфига эътибор қаратамиз ва саёҳатни якунлагач, якуний ҳисобот тайёрлаймиз. Шундай қилсак, янги автомобилни ўзимизнинг бозорга ихтисослаштиришимиз мумкин бўлади», — деди GM Uzbekistan АЖ спорт бўлими раҳбари, менежер Шерзод Жумаев.
Изоҳ (0)