Ҳиндистонда кузатилаётган жазирама сабаб сўнгги бир кун ичида 200 дан ортиқ одам ҳаётдан кўз юмди ва иссиқлик натижасида қурбон бўлганларнинг умумий сони 1412 кишига етди, деб хабар қилади ТАСС.
Ҳиндистоннинг кўпгина туманларида жорий йилда ҳаво ҳарорати меъёридан 7 даража иссиқ бўлмоқда. Пойтахт Нью-Делида 45—46 даража, мамлакатнинг жанубида эса 47—48 даража иссиқлик кузатилмоқда.
Андхра-Прадеш ва Теланга штатларида охирги 11 кун ичида 1360 киши вафот этди. Ҳайдаробод, Гужорот, Рожастон ва бошқа штатларда ҳам қурбонлар қайд қилинди. Нью-Делида ўндан ортиқ одам вафот этгани хабар қилинмоқда.
Ҳайдаробод метеорология маркази директори доктор Редди жазирама яна 3—4 кун кузатилишини айтиб ўтди.
Ҳиндистон ҳукумати шифокорларни зарур бўлган ҳолларда аҳолига шошилинч тиббий ёрдам кўрсатишга шай бўлиб туришга чақирди. Шифокорлар кўпроқ сув ичишни, кўчага камроқ чиқишни ва жисмоний фаолликдан сақланишни маслаҳат бермоқда. Чет эллик сайёҳларга шу кунларда Ҳиндистонга келишдан тийилиб туриш тавсия қилинди.
Изоҳ (0)